全國人大常委、立法會前主席范徐麗泰喺內地知名度同受歡迎程度不嬲都好高，每年兩會喺北京出現經常受到粉絲包圍。粉絲千里追蹤，尋日趁佢出席一個兩岸三地老中年書畫交流會，到場後張櫈都未坐暖，有位內地粉絲即刻走埋佢身邊，以仰慕眼神索簽名。
范太一向來者不拒，但一望對方遞上一本大會場刊，上面並冇佢張玉照時，為免喧賓奪主，佢笑住婉拒話：「都冇我張相，喺度簽名唔係幾好噃！」粉絲當然唔肯罷休，索性連簽名筆都遞埋，范太見對方咁熱情，惟有照簽可也。
當問起立法會主席日前當眾糾正兩名立法會議員讀錯音事件，范太話唔評論對方做法係咪正確，但佢喺任期間就冇改過人哋讀錯字，理由係：「我自己嘅發音都有錯，唔敢去處理人哋嗰啲！」佢仲幫人哋解畫，話主席係校長出身，做事少不免按佢嘅職業背景作出反應喎！
同場嘅民政事務局副局長許曉暉就主動四出派片增人氣，吸引公公婆婆爭住同佢影相。佢自爆從小學習書法同國畫，尤其鍾意寫隸書同篆書，可惜搬咗幾次屋後作品唔見晒，反而四歲囡囡嘅塗鴉作品就放喺家中貼堂。