本身係「架己冷」嘅立法會議員「金勞詹」詹培忠當然係家鄉菜嘅擁躉，八二年仲創辦「佳寧娜潮州菜」，將潮州菜發揚光大，雖然佢已將酒家賣盤好耐，但食開有感情，點都會定期去幫襯吓嘅。金勞詹話最愛係白灼螺片，一般人鍾意點甜海鮮醬或鹹蝦醬，佢就鍾意點辣醬嚟食，話辣味可以帶出螺片嘅鮮味喎！
白灼螺片出晒名夠鮮甜，仲出晒名貴添，每片要六百五十元，值唔值就要各自衡量，但金勞詹坦言潮州菜有平有貴，大可因住荷包去幫襯。佢鍾意白灼螺片外，仲愛食魚翅、魚肚、鮑魚同凍蟹等，仲特別教大家揀凍蟹嘅秘訣，話凍蟹最緊要揀重身大大隻嘅，當然蟹鉗同蟹腳都要大大隻啦，兩斤重約一千元，每次揀凍蟹用呢個標準，保證萬試萬靈！