其實攞命陳好緊張立法會嘅「第一次」，早就將一份足足七十二頁兼圖文並茂嘅powerpoint呈交立法會，會後仲印埋份講稿畀議員同傳媒參考，但兩粒鐘嘅會議冇乜特別消息公布，整色整水都冇用，頭炮打唔響。

仲記得金管局前總裁任志剛以前去立法會，幾乎次次都同議員「駁火」，仲曾經畀議員批評過態度「好寸」同「囂張」，當中性格火爆嘅劉慧卿更執住佢薪酬過高嚟窮追猛打。攞命陳上任時同意減薪卸咁啲壓力，可能前車可鑑，佢答問題好聲好氣，連卿姐都話希望以後同佢可以多啲合作。

最尖銳嗰條算係葉劉淑儀嘅問題，佢問金管局喺推動伊斯蘭債券時，有冇考慮國家同回族之間嘅不明朗因素，再搞落去都係「緣木求魚」，言下之意即係嘥氣咁話。攞命陳就話自知推動伊斯蘭債券困難重重，但「唔做就乜嘢希望都冇」，四両撥千斤卸咗去。

攞命陳做特首辦主任時選拔副局長同局長助理，結果國籍、薪酬風波接踵而至，搞到「倒瀉籮蟹」，依家回歸金管局，今次去立法會又係處男下海，班議員嘅態度似係先禮後兵，放佢一馬。