為求「升呢」，「美食專家」梁許安璞啱啱去完泰國學煮泰菜，日前又飛往西班牙度假，再轉飛英國跟星級名廚Rick Stein學「煮海鮮基本法」，上堂時間只得兩日絕對係「雞精班」。但有幸跟大師煮餸，佢話頻撲啲都值得。
家人知道佢要拜名師，一於爭住跟埋去，老公兼公大校長梁智仁就堅持做「首席試食員」，而大仔捷文同細仔捷鴻力撐媽咪，話要組成梁家三人組一齊上堂。
梁太話喺英國做緊骨科醫生嘅細仔捷鴻對烹飪興趣甚濃，經常攞住媽咪出版嘅「天書」煮番幾味，喺美國從事廣告嘅大仔都唔執輸，抽空由美國飛往英國，陪媽咪、細佬上堂喎！
