20/11/2009

播放本新聞相關短片

政情:唐唐林大輝不認親

煲呔曾喺立法會內有「曾朋友」,疑似特首參選人政務司司長唐唐都有「唐家臣」,佢就係廠商會嘅代表林大輝,事關好多人都知大輝曾經喺唐唐家族嘅針織公司打咗二十幾年工,兩人之後仲合夥搞生意,關係非淺。

前日唐唐喺立法會發表政改聲明時,建制派嘅大輝忽然泛民上身,大聲質問唐唐話方案冇交代普選路線圖,懷疑煲呔曾違反選舉承諾,但無論大輝嘅問題幾咁尖銳,唐唐好似有備而來咁,將質問輕鬆化解。不難令人懷疑佢哋喺度扯貓尾,唱雙簧。

唐唐尋日喺大氣電波度就畀主持問到大輝到底係咪佢頭馬,同埋係咪一早知道大輝嘅問題,晨早準備好答案?可能事先收到風,唐唐大笑三聲後斬釘截鐵咁否認,仲話雖然以前同大輝係同事,但依家除咗工作上,喺政府同立法會議員會「不時溝通」之外,就係清清白白,同大輝冇其他關係喎!

唐唐呢招「不認親」咁刻意同大輝劃清界線,簡直就係踩多腳推大輝落懸崖咁,但佢有冇聽過「此地無銀三百両」呢句說話,愈係刻意,反而愈顯得唔對路。佢同大輝嘅關係究竟係咪好似佢講得咁清白,抑或係斬不斷理還亂?大家拭目以待啦!