前日備受爭議嘅政制改革諮詢文件出台，平時冇乜嘢做嘅林公公終於開始忙。尋日佢去電台為政改解畫，繼續發揮「人肉錄音機」嘅典範，無論人哋問乜，佢都繼續打官腔，話「已擴大民主元素」、「希望各界積極討論」等。不過，冇新意有冇新意嘅好處，起碼幫林公公擋咗一劫。

話說有熱心聽眾，聽厭咗林公公不停咁「播帶」，打上電台劈頭就叫林公公放低官腔，以「個人身份」答佢呢個問題，即時林公公都打個突，唔知呢位聽眾係咪太激動，一時間講唔出問題，於是就出現dead air。

煲呔曾「代表論」激民憤

睇怕喺dead air呢段少少時間，林公公都心驚驚。跟住嗰位聽眾就問：「你到底係咪熱愛民主？」林公公諗咗一秒，睇怕係放下心頭大石，隨即一輪嘴喺度話多年嚟一直都希望香港有普選，一直有爭取各界共識云云，「播帶」播足三分鐘，又再打官腔，冇個人身份可言，始終冇答過人哋問題，好彩嘅係聽眾冇追究，又畀林公公順利過關。

點解話林公公心驚呢？大家係咪覺得呢個情景好熟口熟面呢？喺今年五月煲呔曾去立法會答問大會，畀班泛民議員狂質，要佢用「個人身份」交代佢對六四嘅睇法。沉唔住氣嘅煲呔曾講咗句：「我嘅意見就係代表整體香港人嘅意見」後，呢番「代表論」惹起軒然大波，即刻民望插水，連帶拖累成個政府嘅民望，到今時今日都未升得番。

可能林公公見煲呔曾之前搞到一鑊泡，尋日繼續維持人肉錄音機本色，雖然係陳腔濫調，但總好過講錯嘢激起民憤，相比被外界抨擊為「九流政治家」嘅煲呔曾，林公公似乎高班啲，起碼夠縮骨識得保咗命先吖！