不過同人唔同命，近年地政總署靜雞雞四出收回官地，唔止使埋那渣招數將村民趕出農地，仲話收地並唔涉及公務工程，連最基本賠償農作物損失嘅特惠津貼「青苗費」都唔肯畀。農民遇着兵，有理說不清，真係喊得一句句。

呢嗱，青衣寮肚村村民幾十年如一日過住樸素嘅歸園田居生活，點知今年五月，突然有三戶收到地政總署嘅通知，話佢哋「違例佔用」未批租嘅政府土地，要求盡快拆除喺官地上嘅建築物。如果村民唔遵守指示，不但土地上嘅財物會被沒收，仲可能受到檢控添。

八十一歲嘅羅伯當然好唔忿氣啦，佢話笪地係五十年前向私人承租，後來由一間發展商收購，之後再同政府達成換地協議，自此農地變官地，就咁佢哋突然變咗非法佔用政府土地。

事實上，羅伯喺農地旁邊仍然有一間獲政府承認嘅牌照屋，可以作為佢哋合法耕種嘅有力證據。但係你有你講，地政總署點都聽唔入耳，死撐由於有人喺未經批准嘅政府土地上非法耕種，該署正採取土地管制行動。

最離譜嘅係，地政總署收地唔該理據充分啲吖，為咗收地，居然無所不用其極，藉口多籮籮，更不惜使出那渣招，話收到投訴指農地蚊患嚴重。奇怪喎，地政總署不嬲都係養蚊專家嚟o架，為乜突然跨過界，要做埋防治蚊蟲嗰瓣呢？

呢嗱，有辦你睇，沙田下禾輋村去年十月發生大火，燒咗八間村屋，過咗一年都冇人清理，地政總署求其搵鐵絲網圍住，裏面垃圾堆積如山，周地都係積水，任得現場養蚊為患。如果唔係本報踢爆事件，地政總署依然闊佬懶理。

咁寮肚村到底係咪蚊患勝地呢？有立法會議員陪同地政總署以及食環署官員實地視察，只見一片綠油油，邊度有蚊患問題吖！而負責環境衞生嘅食環署，亦證實過去一年冇收過關於寮肚村嘅蚊患投訴，可見地政總署特登生安白造「蚊患嚴重」為理由收地就真！

再講吖，反正地政總署都為收地而收地，收番之後都係搵鐵絲網圍住丟空喺度，遲啲實聽用嚟養蚊都得嘞。既然依家老村民耕種多年，有人幫手搞埋綠化添，何樂而不為呢？

叮，依家呢個特區政府已經冇晒靈魂，只係識得欺善怕惡。冇辦法啦，得嗰幾個老弱村民，既冇菜園村咁人多勢眾，又冇紀律部隊咁惡死騰騰，地政總署梗係一於玩殘佢哋啦！