前日喺沙田舉行樂聲盃，身為贊助商嘅「電器大王」蒙民偉公子、「蒙仔」蒙德揚當然有去撐場。金融海嘯發生咗一年有多，蒙仔呻話雖然近排樓市、股市好似起番晒，但實情香港嘅經濟情況仲有隱憂㗎，就以佢老本行零售嚟講一直未見起色，充其量只能叫做穩定咗。
跟住仲見到蒙仔嘅雪白「女朋友一號」。吓！乜佢好多女朋友嘅咩？咪表錯情，其實係佢公司代理嘅新相機，外號「女朋友一號」嘅Panasonic Lumix DMC-GF1。呢部相機面世唔夠兩個月，細部得嚟又可以換鏡頭，甚得網民好評，難怪佢都買番部喺馬場四圍影啦！
睇蒙仔揸機嘅姿勢就知佢係攝影發燒友，佢話學生哥時已迷上影黑白菲林相，尤其是影人像，以前屋企仲專登整咗間黑房曬相。近年數碼相機大行其道，佢依然對菲林機不離不棄，直至最近出咗呢部「女朋友一號」，佢先至獻出第一次。