依家啲公司成日以「一人價錢、兩人服務」作為招徠，估唔到連政界都有呢支歌仔唱。話說立法會旅遊界議員阿Paul謝偉俊尋日出席一個討論上海興建迪士尼嘅論壇，佢嘅表現只算中規中矩，幾乎有影皆雙、喺台下支持佢嘅「白姐姐」白韻琴就扯晒火，話阿Paul插啲港府高官插得唔夠狠，又答唔到台下啲觀眾嘅問題，之後仲即場向記者示範一次應該點講。
精於男女關係嘅白姐姐話香港已「獻咗身」畀迪士尼公司，班高官唔做好啲，淨係識向迪士尼彈三彈四，對方咪喺上海整番個二奶囉！佢仲話講到新鮮感同吸引力，大婆邊有得同二奶鬥呢？如果香港仲唔自己執番正啲，繼續向迪士尼公司
哦哦，對方分分鐘會喺西安整多個三奶畀香港歎吓。
跟住佢又主動講到阿Paul即將喺立法會提出停建添馬艦嘅動議，話煲呔曾政府喺二○一二年就下台，邊有咁傻起定個自己只用得一年嘅政府總部？
睇嚟佢似議員多過阿Paul噃，咁會唔會諗吓參選下屆立法會？佢話千祈咪搞，因為做政客有好多顧慮，又驚得罪選民，又唔可以逆阿爺意，成日要違背良心、做好人唔可以Say no，佢反而會勸阿Paul下屆唔好再選添！