新一屆廠商會會長選舉喺本月二十三號正式埋牙，屢敗屢戰嘅呂明華日前已向九十六名現任會董寄出競選政綱，打正口號「服務廠商、服務社會」，政綱有四頁紙，未見有競選靚相，但佢牙擦擦咁話：「選舉講理念，你貼張明星相上去都冇用。」
呂明華戰意高昂，咁對手黃友嘉又點呢？原來寄得仲快手，早喺十月尾已寄出政綱，一百一十八位會董候選人一網打盡。佢份政綱有六頁，競選口號就主打八字真言—「凝聚、團結、創意、發展」，佢話希望集思廣益，唔想搞一言堂喎。
廠商會元老級勢力向來甚關鍵，據聞呢班長老已有共識，唔打算出手干預選情。永遠名譽會長陳永棋話希望今次會長選舉係公平公正公開，元老級唔會意見多多，但話口未完，佢忍唔住讚黃友嘉話：「佢雖然講嘢唔多，其實係實幹派，我認為黃友嘉當選會長嘅贏面極之高。」會長寶座誰屬？呼之欲出啦！