09/11/2009

播放本新聞相關短片

政情：阿Ron望西九有大牌檔

西九文化區管理局尋日舉行第二場公眾論壇，吸引咗二百人出席。人多自然意見多，喺一位居港八年嘅外籍人士眼中，香港特色就係大牌檔同街市，但佢話兩樣嘢都逐漸消失，希望將來可以喺西九重現。西九管理局發展委員會主席阿Ron夏佳理聽見大牌檔即時眉飛色舞，仲話佢都係大牌檔粉絲，平時去完派對之後都好興去大牌檔歎番幾味，所以佢都想將來西九有大牌檔。

依家唔少大牌檔都搬咗去街市熟食中心，阿Ron照樣去幫襯。做過馬會主席嘅佢仲話其實馬會會所都有大牌檔，而大牌檔美食中，佢推介沙嗲牛肉或其他沙嗲類菜式。