依家潮流興速食，乜都要「快、興、新」，但其實有時細水長流都唔錯o架。好似之前授勳時向太太公開示愛嘅立法會衞生服務界代表李國麟咁，同太太李子芬結咗婚近二十年都仲係咁恩愛。
阿麟兩公婆尋日喺中環手拖手行街，行行吓就入咗去喺美國已有八十幾年歷史嘅名牌糖果店See's Candies，麟嫂喺店內左揀右揀，終於揀定一盒拖肥棒棒糖，阿麟仲自動自覺拎銀包出嚟畀錢，果然係廿四孝老公！
問番阿麟先知道，原來佢專登喺中大宿舍揸車陪老婆出嚟買糖，仲話自己細個嘅時候都好鍾意食糖，但依家就係太太鍾意食多啲。不過，佢哋咁遠嚟買糖，原來唔係買畀自己食，而係派畀麟嫂嘅中大同事。可能係愛屋及烏啦！難怪麟嫂冇食糖個笑容都甜到漏！