醫管局主席胡定旭前日單拖入馬場輕鬆吓，順便為兩匹愛駒「心路」同「八逢九紫」做啦啦隊，事關「心路」首次上陣跑千六米路程，肥胡專登攞埋望遠鏡企喺貴賓席，全程
實愛駒嘅表現，可惜「心路」點努力亦只得尾二，肥胡睇見當堂皺晒眉。
另一愛駒跑第三
賽事結束後，佢一個箭步走去向騎師巫斯義「問話」，表情十足訓導主任召見小學生咁，傾咗幾分鐘後似乎仍未「收貨」，再走去搵埋練馬師李易達傾偈。肥胡解釋，召見騎師同練馬師並非詐型，只係想了解「心路」嘅狀態，唔明點解跑成咁。
不過，肥胡另一匹愛駒「八逢九紫」就喺第十場賽事中跑番個第三，帶挈主人袋九萬幾銀獎金，佢即時笑番晒。
