質疑政府走錯方向

本身係教育學院校長嘅行政會議成員張炳良，早前就質疑本港嘅大學教育仍然存在好多弱點，政府應該首先搞掂呢啲問題，再講對外輸出教育服務。做過財政司司長嘅前教統會主席梁錦松跟住都話，其實香港啲資助大學喺國際上好有名，反而私校發展只係喺起步階段，質疑政府係咪走錯方向。浸大校長吳清輝更加踢爆香港地貴人工貴，要搞有質素嘅私校好難維到皮，擔心最後只能吸引到啲外國野雞大學來港。

啲教育界人士擺明係萬「伐」朝曾狂插煲呔曾，本地專上學院明明嗌晒救命，佢仍然懶理，而有啲大學仲以行動話畀煲呔曾知，政府對佢哋嘅支援不足。

多間「本地薑」大學懶理政府希望引入外國私校嘅原意，計劃入紙申請呢兩幅市區地王，其中港大專業進修學院就吼住黃竹坑幅靚地，貪佢鄰近港大校園同興建中嘅南區港鐵站。

公開大學校長梁智仁前日出席一個活動時，亦證實佢哋有意申請另一幅喺何文田嘅地皮，貪嗰度離公大校舍只有一分鐘路程。佢仲話公大正計劃配合六大產業發展，開辦更多創意同檢測認證相關課程，真係畀晒面煲呔曾。

其實，公開大學早喺半年之前，已經問緊政府攞何文田嗰一幅地，點知到最後幅地變咗公開招標，如果政府最後仍然否決晒啲本土大學嘅申請，本地教育界分分鐘會破天荒集體上街倒曾都唔定o架！