小白觀點：買紀念品怕畀人知

唔講真係唔知，乜香港下個月會搞個大型運動會咩？係真唔係呀？好似冇人講過喎？哦，係咪成班水着口靚模打嚟打去跌落水嗰隻呀？如果真係咁盞鬼，有咁多個地區口靚模雲集，冇理由咁冷清清㗎！好彩隔籬豪伯見多識廣，小白老弟依家至知原來有個「東亞運」咋。

唔止東亞運冇人識，聽講嗰兩隻吉祥物嘅紀念品相當滯銷，有個男人畀鏡頭影住佢喺紀念品專門店，個樣幾鬼尷尬呀，耍手擰頭唔認買嘢。咁又係嘅，兩隻吉祥物一出，已經有人讚設計得好似姨媽巾，點買得落手呀？不如中間加一個大紅點，改名叫「大東亞運動會」，淨係搵小澤瑪利亞彈板跳水已經夠睇頭啦！

網友觀點...X）...

[　Wendy　]

唔講真係唔知，冇乜宣傳，係咪根本政府唔想搞o架？

[　奀妹　]

淨係見兩隻白色嘢喺地鐵海報，好老土o架，仲醜過福娃，見到已經唔開胃。

[　容姐　]

運動會，香港邊搞得好o架，香港人都唔愛運動，最叻都係攻打四方城，搞麻雀大賽就啱嘞。

[　子聰　]

東亞運動會實靜英英，宣傳又唔夠多，到時運動員比賽完，連掌聲都欠奉就醜死怪咯。

網址：www.sunsiupak.blogspot.com

阿豪觀點：籃球水球共冶一爐

唔經唔覺，仲有唔夠一個月就到東亞運嘞。講真，家陣香港真係一啲氣氛都冇，紀念品銷情仲十分慘淡，有商舖接受記者訪問時，竟然話東亞運吉祥物太核突，嚇到啲細路仔喊咗出嚟，問你怕未？

話時話，呢兩隻貌似蘿蔔嘅物體仲衰過飛龍標誌，當年禽流感一役香港殺雞百萬名震國際，「飛甩雞毛」嘅代表性點都強過蘿蔔吖。

其實，香港唔係冇潛質辦一場令人「難忘」嘅東亞運㗎：田徑主場館跑道凹凸不平，到時短跑同障礙賽同步進行肯定別開生面；而作為籃球場館嘅西區公園體育館竟然漏水，更可以催生一種集籃球同水球於一身嘅全新運動。

網友觀點...X）...

[　Joey　]

講到門票好似賣得好好，有啲仲爆晒買唔到飛咁，但係事實係我見大部分人都冇咩興趣，究竟啲飛賣咗去邊？

[　Small Bobo　]

香港政府專搞無謂嘢，東亞運勞民傷財之餘，場面仲冷冷清清，真係唔搞好過……

[　開司　]

睇到新聞報道市民都唔知個吉祥物叫乜名，話淨係記得叫「阿乜同阿乜」，真係笑爆嘴！

[　cherry1986　]

話地方細，體操項目搞唔到要取消，搞埋啲冇人睇嘅項目……如果有心搞，一早就應該起體育館啦……

網址：www.lukchiho.blogspot.com