警務處副處長曾偉雄尋日承認，初步報告顯示涉及事件嘅水警有二十九個，絕大部分人當日當緊更。佢仲話警方調查重點係當時嘅行為係咪恰當、有冇違反警隊規定，有關調查會交畀另一個總區去做，發現違規會嚴肅處理喎。

叮，講嚟講去，咪又係自己人查自己人，就算由另一個總區去處理，大家同屬兄弟班，會唔會秉公處理，實在令人懷疑。呢嗱，調查仲未正式展開，已經有消息話，負責調查嘅水警高層聲稱，呢單嘢「唔算嚴重」。既然係咁，仲點查落去吖？

叮！事件涉及濫用公帑，問題嚴唔嚴重應該由市民嚟定奪。依家調查仲未開波，已經有咗先入為主嘅「定調」，最終結果會係點，已經呼之欲出啦，到時睇怕又係虎頭蛇尾，不了了之。

有立法會議員就講得啱喇，事件由水警內部調查簡直「離譜」，呢種自己查自己嘅做法完全唔可以接受，處理唔好，會令警隊聲譽嚴重下挫。佢促請警務處處長鄧竟成親自過問並向立法會提交報告，對公眾有個交代。

查實，警方處理呢單醜聞嘅手法從一開始就令人質疑。警方發言人開頭一口咬定「無違反守則」，話班警官去蒲台島係「實地考察反非法入境者行動」。直至本報圖文並茂踢爆事件之後，佢哋又改口，話「絕不容許任何人員濫用政府資源」。一時一樣，前後矛盾，叫市民點信警方會揸正嚟做先？

審計署已經將醜聞記錄在案，計太一叮話齋，事件涉及濫用公帑，審計署有必要介入調查，警方亦應該好似曾偉雄所承諾，提供必要資料，全面配合調查。當然啦，立法會議員更應該幫納稅人(目及)實啲，窮追猛打，查明真相，追究責任，杜絕呢類公器私用嘅行為。

話時話，事件之所以令市民咁火滾，皆因班水警高官實在太過分。佢哋本身已經享受高薪厚祿，呢頭加完人工，嗰頭又去搵納稅人着數，調動執行緊巡邏任務嘅水警輪送佢哋去擦海鮮。一來一回嘅燃油，再加上警員嘅人工，全部都係納稅人嘅血汗錢，咁都仲話「唔算嚴重」？正如另一位立法會議員話齋，事件已經令警隊形象蕩然無存，市民不滿亦理所當然，警方必須追究責任，處分違紀警官。

講開又講，警隊聲譽近年一落千丈，隨便剝市民光豬、旺角淫警、暴力刑警、人肉路障，醜聞爆完一鑊又一鑊。呢次又整多劑假公濟私，如果當局繼續偏袒，唔嚴肅處理，唔淨止警隊嘅形象玩完，連港府管治威信都玩完。叮！