無師自通係好事，無師不通就可能好大件事，立法會議員黃國健（KK）尋日出席國際詠春聯會搞嘅千人詠春匯演，佢自爆試過跟碟自學氣功八段錦，本來諗住強身健體，點知搞到傷咗筋骨，無喇喇痛咗一段時間！
本身無武術底子嘅KK，舊年諗住學番門手藝健身，但又苦無時間跟師傅上堂，見到屋企有隻教學八段錦嘅光碟，就跟碟練咗幾次，冇耐手腳嘅關節位同腰都有啲「冤痛」，KK拿拿臨去睇醫生，醫生就話佢可能耍八段錦嘅姿勢唔正確，所以傷到筋骨，叫佢唔好再練喎！經此一役，KK話立即將隻光碟掃落床下底，掂都唔掂佢，但就打算的起心肝搵個師傅學番一招半式。