鏞記酒家老闆甘健成係圈中孝順仔，據講每朝都會陪阿媽去飲早茶，風雨不改，我哋尋日喺禮頓道鳳城酒家一轉，果然發現甘老闆喺酒家門口報攤買咗份《東方日報》，然後上酒樓同阿媽和老婆會合，歎番一盅兩件。
甘老闆坐低冇耐就斟茶畀阿媽，又攞點心紙點咗阿媽最鍾意嘅燒賣及西洋菜雲吞，點心到齊後，又夾點心畀阿媽，關懷備至。年屆八十歲嘅甘媽媽非常壯健，每朝慣咗飲早茶，有時仲鍾意去檀島咖啡餅店歎杯奶茶同菠蘿油都未定，講起個仔，甘媽媽話：「呢個仔算係咁喇！」佢仲憶述，甘老闆自小就好鍾意煮嘢食，十一、十二歲嗰陣試過趕工人出廚房，話要自己閉關創作一味好餸，搞咗一大輪，最後煮咗味炆斑尾出來，食落都算唔錯，為日後創作新菜式打下強心針。
不過，最令甘老闆記憶猶新嘅，反而係小時候學整炸蝦片，未炸嘅蝦要喺騎樓風乾先可以落鑊炸，點知流浪貓出動偷食，六十多塊蝦片只剩番三幾塊。