本文重點
立法會足球隊尋日又出動，隊中成員、旅遊界代表謝偉俊（Paul）卻攞正牌做牆頭草，上半場係立法會隊員，下半場就掉轉槍頭，因為立法會隊尋日嘅對手係旅遊界，所以佢下半場變身旅遊界代表，最後立法會隊以五比二勝出，旅遊界隊兵敗如山倒。最好笑嘅係，立法會內務委員會主席劉健儀負責頒獎，徇眾要求向球員獻吻，但長毛梁國雄姍姍來遲，劉健儀即刻話：「獻吻程序已經過咗嘞。」點解佢咁驚錫長毛嘅？
同董耀中握手泯恩仇
尋日賽事仲有另一個焦點，即阿Paul同宿敵旅遊業議會總幹事董耀中同場出現，記得上年立法會選舉，董耀中掛住富貴黨招牌參選，被阿Paul連番狙擊，指旅遊業議會同業界有利益衝突，二人勢同水火，點知尋日冤家路窄，當兩隊交換錦旗時，佢哋好識大體，握手泯恩仇。立法會足球隊隊長林大輝即刻講笑話：「證明足球幾咁偉大，呢吓就叫世紀握手嘞！」
尋日場波，立法會上半場本來先輸一球，旅遊界曾經士氣大振，可惜半場未到，被立法會隊連追三球，兵敗如山倒，以二比五大輸。