本文重點
政府擴大政治委任制之後，引入咗一班高薪厚祿、唔知做過乜嘅副局長、政治助理，一年過去，呢班高薪預備官都係冇乜建樹，民調仲發現市民大都唔識佢哋，民政事務局副局長許曉暉（Florence）更只有百分之零點三嘅受訪者噏得出佢個名，連立法會議員「高達」李永達叫錯佢做「許兆暉」，似乎呢位女高官真係冇人識。
「佢知我叫Florence㗎」
Florence尋日出席一個場合時，一聽到「叫錯名」三個字就好大反應咁話：「佢知我叫Florence㗎！」佢解釋，高達叫錯佢個名只係一場誤會，因為大家平時用英文名稱呼對方，所以講起中文名時，可能一時口快叫錯。Florence仲話，高達本身都有幾個朋友叫「許×暉」，可能因為咁，先會一時口快叫錯咗第二個朋友個名出嚟，佢仲話唔會因為呢啲事唔開心喎！
聽Florence嘅語氣，好似都冇乜在意過自己知名度奇低嘅問題，仲不斷咁搵藉口令自己感覺良好。如果人哋真係口快叫錯佢個名都仲好，但民調結果係不爭嘅事實，睇嚟Florence都係時候諗下，點改善自己「面目模糊」嘅形象啦！