城中掀起新一輪疑似特首參選人嘅競猜遊戲，行會召集人梁振英CY每次應付呢啲提問一向都係遮遮掩掩，唔肯正面回應。不過，佢尋日出席一個電台節目時，被問到選舉特首一旦失敗嘅感受時，就冇好似以往咁顧左右而言他，而係坦然接波，話自己一向做公職都覺得要無愧於心，只會諗社會需要佢做乜、可以有乜貢獻，至於選舉，佢話：「其實選贏選輸或社會評價係點，都可以坦然去面對，並非選舉唔選舉，我平日做事都係咁。」
CY呢次大膽直率嘅表白真係好少見，亦令佢向特首參選人身份邁進一步。佢尋日話，做公職二十幾三十年，一直都係盡最大努力去做，只要對社會有貢獻就會盡最大努力去做。佢仲加兩錢肉緊話：「（我）係為做公職或同社會有關嘅事，並非為自己個人榮辱，更加唔係為光宗耀祖去做事。」
佢強調自己做公職但求無愧於心，只要立定心意，就可以坦然面對將來，無論係選贏定輸。