東亞運籌委會主席霍震霆成日飛嚟飛去，日前見佢單拖現身旅行篋名店Rimowa揀篋，佢戴住黑超慢慢睇，佢對一款三十一吋大、用聚碳酸酯製成嘅銀色旅行篋特別感興趣，邊睇邊伸手敲吓篋身外殼，睇吓個篋實唔實淨，呢隻逾百年歷史嘅德國名牌篋盛惠五千八蚊，霍公子揀咗陣，都話係：「睇吓啫，未決定買唔買。」
霍公子解釋話，倫敦嗰邊啲人（酒店侍應）嫌佢個篋太重，為他人着想，寧願花少少錢換篋。咪住先！倫敦嚟緊有乜盛事要霍公子出差先？2012年倫敦奧運舉行在即，唔通霍公子依家就揀定個「奧運專用旅行篋」!？
倫敦奧運未有耐，殺到埋身嘅反而係東亞運，我哋喺另外一個場合見到佢嗰陣，問佢會唔會同來港參加東亞運動會跳水比賽嘅跳水公主郭晶晶同囝囝啟剛會面時，佢笑說：「今次佢（郭晶晶）嚟係代表比賽，（有冇同你飲吓茶？）佢係體育界身份，要有紀律。」
不過，佢就不忘推銷香港，嗌啲國家運動健兒來港多啲購物；「佢哋個個都鍾意香港，希望佢哋今次嚟唔好淨係為比賽，香港咁好，做啲shopping啦」。