已經升呢為馬教授嘅肥亨，尋日喺電台大講自己打工三十五年、歷五個僱主，走遍港加職場及公私營機構嘅經驗，希望大學生眼光闊啲。佢話，過去咁多年，自己決定做乜嘢工從嚟唔係諗錢，而係諗家庭同埋自我挑戰，勸喻啲學生搵嘢做唔好淨係諗錢。

呻通識講座拍烏蠅

肥亨耿耿於懷大學生嘅視野，佢話，一個人嘅思考能力、溝通能力同視野好重要：「如果一個人視野狹窄，淨係識自己範疇嘅事，點得嘅！」可惜嘅係，佢早前喺港大主講一個「環球轉變的挑戰」嘅通識講座，百幾人報咗名，出席嘅唔到一半人，時下學生唔重視培訓自己視野嘅機會，佢講起都好唏噓。

尋日嘅節目嘉賓係行會召集人CY梁振英，佢講起時下大學生更講咗一番自己參加另一個通識研討會嘅遭遇，佢話，當日見好多學生着短褲踢人字拖入會堂已經心中打個突，唔係好高興，點知有個坐喺第三排座位嘅女生，雖然近到可以同台上嘉賓有眼神交流，但就完全唔尊重場合。

CY好細膩咁描述個女生攞盒糯米糍出來一粒一粒咁食，跟住電話響起，佢傾咗二十秒，又繼續食糯米糍，再講另一個電話二十秒……CY未講完，肥亨已經語帶驚訝咁話：「嘩，好唔尊重你噃！」CY苦笑話，我如果未食飯去講座，都唔會一邊講一邊食三文治啦，更唔會傾電話喇。佢哋咁苦口婆心，唔知啲大學生收唔收到呢？