小白觀點:咁有組織預謀要搵O記查
水警阿蛇搞個一行二十九人海鮮精華遊,事件黃咗,有警官訴苦話因盛情難卻至參加,好心唔好死撐啦,喺河邊行又點會唔濕腳吖?有網民講得啱,呢單嘢係有組織、有預謀同熟練嘅行動,警方自己人查自己人唔係唔得,但係咪要交畀專查有組織及嚴重罪案嘅O記呢?
早知今日,何必當初呢?水警一早應該學白車咁搞一個行三級制檢討咪得囉,當值大蛇因體內忽然缺碘,爭取時間上島食海鮮補充番,列為第一級,水警輪九分鐘內到;第二級係休班警官緊急要狂灌回魂白酒,目標十二分鐘內到達;第三級當然係非危急個案,以後如果小市民釣墨魚跌落海,Sorry,水警輪唔知幾時至到咯。
網友觀點......
懶人
見到有啲咁正旅行,相信會有更多人去考警察!
Jack
呢個團真係吸引,不如水警轉型與大眾同樂,市民都同玩水警輪遊,齊齊飲飽食醉!yeah!
石神
離晒譜!借公務為名,用水警輪去玩樂就係唔啱,個個醉貓咁款!身為紀律部隊,醜死人!
怪醫秦博士
飲茶食飯係人之常情啦,但係使唔使坐水警輪仲要去到離島咁遠去食飯呀!!離晒大譜!
網址:www.sunsiupak.blogspot.com
阿豪觀點:強姦報案人都可死撐查案
水警高級警官帶隊赴離島歎海鮮事件疑點重重,到底佢哋喺島上有冇部署打擊非法入境嘅行動呢?飲酒嘅人係咪全部都係休班警員……
不過話時話,記者明明全程直擊,都冇發現班阿sir喺島上有咩部署工作,點解警方仲可以死撐?唯一合理解釋係,當時成班阿sir,無論休班抑或當值,一心只係諗住點樣捉人蛇,就算佢哋未必有落site視察,都一樣可以達到「手中無劍,心中有劍」嘅最高境界。如果唔係嘅話,又唔見有警員強姦報案人,可以解釋為「查緊案」?我哋與其追究係唔係有人濫用公帑,倒不如同情吓呢班咁盡心盡力嘅警官,連食餐飯都唔盡興,隨時背脊骨落!
網友觀點......
尖子
咁佢哋飲飽食醉之後,係唔係pair pair夫咁返工呢?
匿名
係都唔出奇啦……依家啲差人槍法咁差,可能飲醉咗反而仲好添喎,可以派佢哋去索馬里打海盜。
靈高史特
我懷疑呢單都唔知係咪冰山一角咋。你諗吓,陸上嘅差人都經常被揭發有蛇竇o架啦!
正蠢材
點解警隊咁多負面新聞o架,叫小市民點樣再相信佢哋?
網址:www.lukchiho.blogspot.com