尋日上晝，有班着晒便服或者西裝嘅人，齊集香港仔水警基地。睇真啲，全部係來自水警南分區同海港警區嘅高官，個個着到咁Casual，原來另有「任務」。中午時分，佢哋全部登上預先安排好嘅水警輪，半粒鐘之後，水警輪抵達蒲台島碼頭。

咦，呢排成日有非法入境者經海路偷渡來港做黑工，唔通係水警「便服捉蛇」行動？又唔似噃，一行人跟住水警海港警區指揮官梁文幹，有講有笑，走入島上唯一嘅海鮮酒家。原來唔係捉蛇，係開蛇王大食會。

有消息話，呢次筵開三席，名義上係歡送兩位即將退休嘅高級警官，其實亦係為預祝「大Sir」梁文幹「紮職」，榮升總警司。貴客臨門，食肆自然要畀面，不過其他食客就慘咯，等咗半日都冇人招呼。

叮！據講，呢艘水警輪本來執行緊巡邏任務，懷疑有人濫用職權，調過嚟送班高官去開派對。水警輪係公共財產，費用由納稅人埋單。正如警務督察協會主席廖潔明話齋，無論警員休班定當值，都唔可以將水警輪公器私用，就算艘船唔當值都唔可以，因為所用嘅燃油係由公帑支付。

至搞笑嘅係，警察公共關係科回覆本報查詢嗰陣話，水警高官尋日喺水警基地開完反非法入境者工作會議，中午去蒲台島係「就如何打擊非法入境者的堵截行動作實地視察和商討部署工作」。開完會咁啱係「法定用膳時間」，於是喺島上開埋餐，並冇違反內部守則。

叮！唔係噃，據記者所見，呢班人一上岸就去食海鮮大餐，隊完白酒隊啤酒，鬼咁Happy，食飽飲足之後，仲喺碼頭擺晒甫士影張大合照，然後施施然上船離開，由頭到尾，冇做過一啲同打擊非法入境者有關嘅嘢。唔通食嗰啲魚蝦蟹，全部有「非法入境」嫌疑，佢哋要吞落肚用個胃「實地視察」？

再講，就算真係去蒲台島做嘢，喺「法定用膳」時間開餐，邊條內部守則話佢哋可以隊完一杯又一杯，飲到面紅耳熱㗎？唔通呢啲都屬於「正常工作範圍」？

警察以維護法紀為己任，市民嘅觀感好緊要。但係近排警隊聲譽認真麻麻，警員喺警署入面強姦女報案人、以市民車輛做「人肉路障」堵截非法賽車，依家水警又有高官懷疑集體濫權，巧立名目公器私用。市民對警察嘅印象愈來愈差，邊有人相信佢哋會全力維護法紀，又點可以警民合作吖。叮！