小白觀點：叉電充飢永久解脫
財金官員三日唔埋兩日就拋啲數據出嚟，講到依家嘅經濟點好點好，但小白老弟信民間智慧多啲。最新統計顯示，酒樓生意跌到飛起，之但係快餐店嘅生意呢，就逆市好到不得了，證明絕大部分小市民仍然慳住使。或者係小市民錯誤解讀政府官員嘅說話都未定，查實佢哋係想講「經濟快餐漸露曙光」之嘛。
好又一餐，唔好又一餐，有快餐食都算係咁啦，到打工仔有日連快餐都食唔起嗰時，喺維園做食蟻獸，啲官會問你：「何不食快餐？」再唔係，當局遲啲又話快餐店產生太多油煙污染環境，下令小市民改用叉電充飢，方法好簡單，只要三隻手指插入電掣，以後就連快餐都唔使捱嘞！
網友觀點......
Ben
高官講乜都係假，數據統計最實際，小市民梗係慳住使啦！食少着少，唉……呢啲日子幾時過呀？
發記
個市都未好，一陣政府又話加電費，左加右加，遲啲連快餐都冇得食呀。
Frank
有得食快餐咪好囉，我拮串魚蛋當一餐㗎咋！
Jon仔
以前晚晚都出街蒲，食飯消夜直落，會飲番幾杯㗎嘛！依家就慳住荷包，返屋企大覺瞓，幾空虛！
網址：www.sunsiupak.blogspot.com
阿豪觀點：超中產享受仲想點
政府數據顯示，酒樓等食肆去年生意額全線下跌，唯獨快餐店生意逆市上升。咁就梗係啦，打工仔隨時打爛飯碗，梗係慳得就慳！
唉，其實有得食快餐都已經係唔錯囉！大家唔好唔記得喎，依家好多中產人士慘到要去食物銀行申領救濟，快餐店對佢哋嚟講，已經係「山珍海錯」喇，只要大家光顧快餐店時抱住正確心態，一味諗住自己已經有「超中產享受」，咁就自然會開心好多！
可能讀者會問：食得多快餐店提供嘅垃圾食品，會唔會搞到周身病痛㗎？大家放心啦，呢樣嘢實走唔甩。都係嗰句，只要抱住正確心態，一味諗住肥胖呀、血脂過高呀等通通都係「富貴病」，就會歡迎佢哋㗎喇！
網友觀點......
傻仔
有得歎快餐，唔使吓吓捱即食麵，仲想點呀？
冇符
真係慘，窮人就要焗住食垃圾食品。
匿名
大××同美×都唔係好差之嘛，有飯有菜有肉，不過都幾貴㗎，廿幾三十蚊一餐。
working class hero
食快餐未算係窮到燶，起碼都未使光顧食物銀行！
網址：www.lukchiho.blogspot.com