按慣例要各個議員抽籤，睇吓同乜嘢官同枱食飯。飯後問番立法會工業界代表梁君彥，到底同咗邊啲官「撐枱腳」呀？佢數晒成枱人嘅名，但點都噏唔出個官名，仲係咁話：「環境局嗰個呢！嗰個乜嘢呀！」最後要記者提水，先講得番「環境局副局長潘潔」。

唔認識副局長嘅議員絕對唔止梁君彥一個，仲有白鴿黨嘅李永達，雖然認得民政事務局副局長許曉暉個樣，但就記錯佢個名，係咁叫佢做「許兆暉」。

除咗新嗰兩個副局長外，其餘嗰幾個上咗任年幾，每月二十萬元人工，尤其潘潔同許曉暉經常要喺立法會解畫，應該同啲議員打慣交道㗎，點解喺班議員眼中會「面目模糊」？睇怕佢哋都要自問「Who am I ?（我是誰？）」囉，你話死未吖！