唔少名人都讀過港大專業進修學院嘅課程，學院尋日頒證書表揚二十五名傑出校友，包括馬會主席阿John陳祖澤、全國人大常委范徐麗泰、天文台前台長「黑英」林超英同埋骨科名醫高永文等。睇番呢班名人修讀嘅課程真係乜都有，最搞笑嘅係黑英，因為好難想像佢曾經學過現代舞。
其實黑英學跳舞已經係上世紀八○年嘅事，佢當初考慮學邊種舞時，覺得跳社交舞好生硬，又要死記舞步，隨時踩親人，所以選擇學較柔軟嘅現代舞，赤腳就跳得，非常自由，足足學咗半年。學完之後又有乜得着呢？黑英話好有用，每當欣賞其他人跳現代舞時，會容易明白啲。