煲呔曾尋日中午喺禮賓府宴請全體立法會議員，本身已有向班議員求和示好嘅意思，但唔知係有心定無意，佢安排咗兩名即將結婚嘅議員夾住自己坐，立即畀人揶揄佢係想為自己沖喜吓。白鴿黨李永達更加喺席間陰陰嘴笑咁同煲呔曾講，真係要衷心多謝你，如果唔係你幫甘乃威擋一擋，做番幾日報章頭版，白鴿黨實有排煩！當時煲呔曾淨係識一邊苦笑，一邊作狀打高達兩錘，估計佢食完呢餐飯同之後嘅下午茶後，真係背脊骨落。
下午茶？事關煲呔曾喺午宴結束不足個半鐘後，再誠邀外號五散人嘅五個建制派功能組別議員上禮賓府飲下午茶。早前五散人要求好似其他立法會黨派咁就施政報告同煲呔曾獨立會面，但煲呔曾就以佢哋唔係一個正式政團為由，請佢哋食檸檬，間接迫使五散人走上反政府行列，多次聯手倒戈畀顏色煲呔曾睇。
煲呔曾最近民望急跌、眾叛親離，睇嚟係迫於無奈擺和頭酒，間接向五人認衰道歉，名副其實係「面就人哋畀，架就自己丟」。
佢仲早過其他政黨一日，搶先同五散人討論政改問題，但五散人就當面表明溝通完都唔等於佢哋會變做保皇黨，乜嘢都畀票支持政府，煲呔曾惟有死死地氣咁話：「我都知嘅！」