就喺行會集體負責制名存實亡之際，繼行會前成員田北俊批評個別行會成員嘅言論有違行會集體負責制後，另一行會成員阿Ron夏佳理尋日出席電視節目時忽然「行會召集人」上身，話相信行會成員好清楚行會嘅規則，所以無論個別成員有乜嘢個人背景、環境，入得行會就要遵守集體負責制嘅規則。

雖然阿Ron冇指名道姓話係邊啲「個別成員」，但盲嘅都睇得出係講緊建議復建居屋同賣地嘅張炳良同鄭耀棠。

豪宅創天價，惹嚟市民怨聲載道話難以置業，身兼房委會委員嘅張炳一個箭步彈出嚟倡議復建居屋，連帶身兼工聯會會長嘅棠哥都出嚟贈興，為打工仔出番啖氣，要求復建居屋。兩人嘅言論令政府非常尷尬同焦急，但真正嘅行會召集人CY梁振英卻力撐張炳同棠哥，變相撐埋自己當年支持設立最低工資。

經濟唔好 市民首當其衝

阿Ron仲力撐慳電膽同驗毒風波，聲言驗毒幾時推行都好大爭議，又話大部分市民相信慳電膽事件唔涉及利益衝突。講到煲呔曾民望急跌，阿Ron就歸咎於經濟唔好，仲話：「好多市民就算唔失業都要減薪，就算唔減薪都要凍薪，好自然有民怨啦！」聽完阿Ron咁講，睇嚟佢似行會召集人多過CY喎，仲揸住條鞭係咁鞭「曳仔」張炳、棠哥同CY添！

一直批評行會成員唱反調嘅田少尋日又搵到新觀點，話前日立法會通過重建居屋動議，作為行會成員嘅劉皇發同劉江華竟然冇投票，更加令人覺得行會成員有權冇責，集體負責制名存實亡。之不過，大家唔好忘記，田少係反對復建居屋嘅！