睇吓張「成績單」，又似乎冇吹水噃。七成受訪市民同意按病情輕重提供白車救護服務；超過六成贊成分級制嘅目標到達時間同服務承諾，唔通分級制真係咁掂？

咪住！諮詢期四個月咁長，港府收到唔同團體同市民個人嘅書面意見，加埋至得四百份咁大把，支持嘅不過得兩百幾份。白車分級制喺社會惹起咁大爭議，當局單憑呢個咁無代表性嘅數字，就得出「大部分市民都支持」嘅結論，牽強啲啩？

再講，自從港府建議將救護車調派時間分危急、嚴重同非危急三級，到達時間分別係九、十二同二十分鐘，市民普遍擔心實施之後，真正有需要嘅病人得唔到及時救治。甚至連負責救護工作嘅前線員工都唱反調。救護員工會早幾日仲狂炳港府，話建議係經濟掛帥「向錢看」，目的係為咗慳錢。

市民有疑慮，前線員工唔睇好，政府憑乜嘢話大部分市民支持呀？當局唔因應民意反彈作檢討，反而扮晒嘢做場「諮詢」大龍鳳，仲煞有介事咁話，建議得到市民支持，呃鬼食豆腐咩。

叮！本港緊急救護服務質素係點，淨係數吓呢幾個月白車半路死火，病人延誤治理嘅畸士就知啦。嗰支老爺白車隊，二百幾架車平均使用超過八年，遠超出七年嘅使用期限，最多試過一個禮拜跪低近十架。

白車超齡服役問題唔解決，就算港府分幾級，承諾幾快到都冇鬼用。白車隨時死火，要周圍撲搵過架，等得嚟，死得人多咯。話到尾，問題癥結只有一個，就係資源嚴重不足，無論人手定白車，都滿足唔到市民需要。

但港府一味諗縮數，推出諮詢建議嗰陣，居然話五成召喚個案係求助者感到皮膚痕癢、失眠呢類非危急個案。言下之意，白車成日出事，係因為市民濫用啫，唔關資源不足事。點知消防處後來有份內部調查話，抽查咗一萬一千宗白車召喚個案，非危急個案只有約一成，當堂拆穿當局嘅西洋鏡。

叮！港府簡直係姓賴嘅，香港一日平均千幾宗緊急召喚，唔排除有極少數濫用個案，但絕大多數市民都係有緊急情況至叫白車啫，無端端Call架嚟，貪利是咩！想推卸資源投放不足嘅責任，唔該搵個好啲嘅理由吖。

其實一字咁淺，只要增撥資源，請多啲人手，淘汰啲老爺車，服務質素自然會改善。港府咁鍾意諮詢，不如就點樣將高官薪酬同白車表現掛鈎，跪低一次扣一日人工，諮詢多一次吖笨？