卿姐引述聯合國消除對婦女歧視委員會報告，質疑功能組別選舉由男性主導，間接歧視婦女。有人肉錄音機之稱嘅林公公就發揮死都拗番生嘅精神，話本港現有二十二萬五千幾名功能組別選民，其中五成四係女性，又話社福、衞生服務同教育界三個女性選民多嘅組別揀咗男議員；而男選民較多嘅法律、勞工、紡織同運輸界就揀咗女議員當選，證明選民嘅性別同當選議員嘅性別係冇直接關係嘅。

卿姐當然唔認輸，炮轟林公公以偏概全，點名指鄉議局、漁農界、工商界等咁多年嚟都冇女性當選過，甚至連女候選人都冇，有議員為咗聲援佢，用上「無性界別」嚟形容呢啲組別，議事廳隨即爆出一陣竊竊私語，質疑所謂無性係「無性別」定係「無性事」？林公公最後都要投降，但都強調本港選舉制度冇歧視女性！