中大醫學院副院長沈祖堯獲中大校長遴選委員會通過為校長候選人，身兼中大校董會主席嘅滙豐亞太區主席鄭海泉尋日就話，對沈教授好有信心，相信下禮拜二校董會投票時，佢可以得到其他校董支持，成功出任校長喎！
城大兩年前選校長要推倒重來，早前浸大選校長又畀教職員批評係黑箱作業，中大會唔會陰溝翻船呢？鄭大班話，唔擔心呢啲事件會喺中大重演。
鄭大班雖然公開明撐沈教授，但原來佢對沈教授認識唔深，只係知其名，後識其人，不過最近佢同沈教授接觸多咗，覺得佢係一個好隨和嘅人，令佢最感動嘅係沈教授喺對抗沙士期間嗰種「搏晒命」嘅精神，仲話有呢種拚搏精神嘅「亞洲英雄」，一定係「十分十分適合」嘅校長人選。