本文重點
煲呔曾醜聞纏身，但佢毫無自省之心，繼早前惡人先告狀鬧傳媒「無中生有」後，日前佢同金管局新任總裁「攞命陳」陳德霖一齊赴立法會議員「金勞詹」詹培忠嘅飯局時，更繼續死雞撐飯蓋，一坐低就話自己：「畀人蝦呀！」搞到金勞詹都睇唔過眼，當面省吓佢。
金勞詹嗌煲呔曾做人要誠懇，做錯嘢咪認衰囉，傳媒同市民批評你，咪認咗佢囉，唔好再講乜嘢視民望如浮雲喇，更加咪再咁自大，好似○五年一上任就話強政勵治呢類說話，千祈咪再講喇！
教精攞命陳要分權
跟住，金勞詹連啱啱由特首辦主任轉任金管局總裁嘅攞命陳都省埋，當面點醒佢千祈唔好剛愎自用，以為自己天下無敵，要識得分權，啲嘢唔識就唔好死充，交畀下屬去做。金勞詹一向盯實任總，佢前晚仲幽攞命陳一默，同佢講：「你嘅人工得任總七成，我鬧你亦都鬧七成。」
當晚嘅飯局地點喺金勞詹嘅鐵竇潮州酒家佳寧娜，佢哋每人食咗兩隻大閘蟹，靚酒梗係唔少得啦，唔知煲呔曾同攞命陳會唔會掛住食嘢，聽唔入金勞詹嘅金石良言呢？