本港主辦嘅東亞運動會下個月正式開鑼，科技大學尋日搞咗個「A貨」火炬傳遞，我哋都預報咗新任校長陳繁昌會粉墨登場，不過，陳校長嘅處男騷卻遇上大整蠱，佢負責最尾一棒火炬傳遞，跑跑吓個火炬竟然熄咗，真係大吉利是。
陳校長尋日以T恤短褲鴨嘴帽上陣，呢幾日天氣轉涼，佢就喺T恤入面加件長袖衫打底。佢話，自己由細到大都好鍾意做運動，中學時係足球校隊，最拿手踢右翼位置，幫過學校攞過唔少次學界冠軍；依家得閒就會去打網球，佢同新出爐嘅諾貝爾獎得主兼中大前校長高錕都曾經過過兩招，大家實力算旗鼓相當。
傳火炬「甩轆」後，陳校長一啲都冇掃興，仲話好想親身去睇吓東亞運動會嘅賽事，好似足球、排球、乒乓球、羽毛球咁，支持香港同中國隊。