本文重點
上海落實興建迪士尼樂園，商務及經濟發展局局長劉吳惠蘭（Rita）尋日去到邊都畀人問香港點算，佢喺鏡頭前雖然高呼「綽綽有餘」，但去到立法會出席大會時卻按唔住心底嘅火，喺會展擴建嘅議題上教訓公文袋嘅陳淑莊（Tanya）：「陳議員，可能新加入立法會唔知道……」，又嘲諷Tanya引述嘅文件係「公開嘅秘密」。畀人咁樣公開訓示，Tanya梗係扁晒嘴啦，呢齣議會版《東宮西宮》真人騷明顯令佢好唔開心。
Rita尋日出席立法會答問環節時，面色已經凝重，當佢聽到Tanya引述一份報道指政府喺○三年一份內部文件中提到，如果亞洲國際博覽館嘅額外十萬平方米展覽場興建後仍未滿足到展覽需求，至考慮興建會展第三期，質問政府係咪有呢個承諾？佢面色更嚴肅。
做咗蔡菜子替身
呢個報道同Tanya嘅提問夾都冇咁啱同日出籠，明眼人都知事出有因啦，所以Rita講完官式答案後，忍唔住點名話Tanya係議會新手，唔知道前因後果，仲話當局早喺○四年十月已經提交立法會，如果話呢份文件係秘密，都一定係「公開嘅秘密」。佢嘅潛台詞等於話新丁議員Tanya嘅質疑係人云亦云，冇做好功課。
接招之後，Tanya面色一沉，事後反唇相譏話自己從來都冇話份文件係機密，仲七情上面咁向其他議員表達不滿：「局長窒人！」
被官窒已經唔開心，人稱IQ博士嘅立法會商界代表黃宜弘尋日又笑Tanya：「陳議員做咗前立法會議員蔡菜子（蔡素玉）嘅替身。」點解﹖因為蔡菜子以前做立法會議員期間，亦係主力跟進會展事宜。新丁議員一日接兩招，難怪Tanya笑唔出啦。