小白觀點：掟西瓜落水尋人

煲呔曾民望又再表演花式插水，佢老哥不嬲都視民望如浮雲，自然可以豁出去，臨場發揮出最高水準！唔係講笑㗎，大家有眼睇，煲呔曾唔使喺高台跳落嚟，只不過係男子三米彈板之嘛，犀利囉，竟然可以凌空轉身三周半，喺極短時間內表演多個益親家花式，最後再嚟多個錦鯉翻身，好似深水炸彈咁直插水底，真係令人拍案叫絕！

不過，佢直入水底之後，好耐都唔蒲頭。哎唷，真係擔心死人喇！小白老弟好想掟個西瓜落水，睇吓煲呔曾會唔會浮面都好吖。你知啦，相信好多Die Hard粉絲一見佢蒲頭，就會即刻從後飛撲過去畀佢一個熊抱，再咬吓耳仔，問佢可唔可以幫手拎番啲雷曼迷債嘛！

網友觀點...X）...

[　積琪　]

跌到五十分樓下喎，我係佢都好瘀啦！返屋企匿喺床下底好過。

[　Kelvin　]

呢類民調最鍾意喺呢啲時候出嚟踩多兩腳㗎啦，跌幅咁大，煲呔曾小心跣親呀！

[　海美　]

煲呔曾又係爭唔落嘅，畀晒機會你，仲整份咁嘅施政報告出嚟，唔激起民憤就假啦！

[　雄哥　]

事情梗有兩面睇嘅，如果整份頌親恩民調出嚟，煲呔曾分數實爆燈！

網址：www.sunsiupak.blogspot.com

阿豪觀點：創意工業催化者

煲呔曾民望低處未算低，港大民意研究計劃顯示佢只得四十八點四分嘅「不合格」新低。負責調查嘅學者講到明，煲呔曾攞呢個分已經可以被列作「不受歡迎」人物，如果低到得四十五分，就直頭有「信任危機」添！

咁香港人就慘啦，煲呔曾講到明民望於佢如浮雲，咁即係話如果佢賴死唔走，市民可能仲有兩年幾要捱！

不過，香港人都唔使太悲觀，依家港府力推創意工業成為六大優勢產業之一，計我話，煲呔曾都可以為唔少創意產品提供靈感。嗱！好似話政治諷刺漫畫咁吖，老董舊時坊間都出咗唔少㗎；其他包括《笑話大全》、出氣公仔等創意產品，趁呢個倒曾潮嘅時勢推出，肯定熱賣呀！

網友觀點...X）...

[　廢曼　]

煲呔曾會唔會再度發爛渣，勁鬧啲民調機構無中生有㗎？

[　開司　]

嘩，搞到成鑊粥咁，唔通民望仲有得上升咩？

[　this is it　]

雖然煲呔曾對於外界將佢同阿扁相提並論好反感，但係佢一味夠賴皮，呢一點同阿扁又真係好相似。

[　尖子　]

做特首梗係過癮啦，親戚有咩頭暈身㷫，投資損手都可以照顧到嘛……

網址：www.lukchiho.blogspot.com