嗱嗱嗱，據香港大學民意研究計劃嘅最新調查顯示，煲呔曾嘅民望直插，係上任以來嘅新低。小市民對佢嘅評分又點呢？係四十八點四分嘅「不合格」，比起半個月前未爆任何醜聞嘅時候跌咗五點八分，仲有近五成反對煲呔曾出任特首添呀。

至於對特區政府表現滿意率，亦都一樣跌到阿媽都唔認得，咪就係多得煲呔曾好帶挈囉，連特區政府都要畀施政報告佗衰晒，市民對成個政府嘅不滿率上升至百分之三十九，創○五年一月以嚟新高！

呢啲數字代表咗乜呢？據研究計劃分析，得分唔夠五十分嘅政治人物，已經可以被視為「不受歡迎」。而得分唔夠四十五分嘅仲大劑，直頭可以稱得上面對信任危機。即係話，依家煲呔曾嘅得分，離信任危機只係一步之遙咋！

話時話，全運會跳水項目打分有冇造假就唔知，但係民調呢家嘢，有廣泛嘅代表性，完全反映咗小市民嘅聲音，好難「無中生有」㗎喎！

正如中大亞太研究所前排公布最新民意調查，受訪市民對施政報告嘅評分亦都係急跌至四十六點五分嘅不合格水平，係煲呔曾歷來最低分嘅一份施政報告。

叮！畀全世界知道香港有個咁低民望嘅特首，你估香港人唔醜咩？如果煲呔曾真係以民為本、強政勵治兼夾急市民之所急，冇理由近排各式各樣嘅民意調查特登玩「惡意中傷」，係都要話煲呔曾民望插水㗎！立法會議員亦都冇理由否決施政報告致謝動議㗎！

鬼咩，施政報告基本上就係一份百無報告，一味炒冷飯，扶貧紓困措施欠奉。最巴閉嘅，咪就係派半粒食咗背脊骨落嘅糖，未經諮詢就掟咗個慳電膽現金券出嚟，結果搞出一個益親家嘅大頭佛。喺眾怒難犯之下，當局又要打退堂鼓推倒重來，幾時落實都係未知之數，不過按照之前嘅慣例，怕且都要爛尾收場。

弊在煲呔曾由始至終都冇好好咁自我反省，當個別商界人士玩畀面派對讚一句，即刻鬆毛鬆翼，之但係對於絕大部分小市民嘅怒吼，佢就當係耳邊風，一味只係黑起塊面誣衊傳媒「無中生有」。難怪有立法會議員質疑，佢已經冇咗自省能力，只聽到支持自己嘅聲音。

咁又難怪喎，煲呔曾有正經事唔做，成日潛水唔見人，其實就係為咗潛心修煉民意不入嘅金鐘罩神功。

所以呢，就算民意調查顯示煲呔曾零分又如何，佢已經進入化境，一早視民望如浮雲啦。