社民連最近爆內訌，五名行政委員集體退黨，講穿咗其實係為咗明年初領導層換屆嘅爭權角力，主席黃毓民話會按計劃卸任主席，之後仲會帶領社民連三條腿走路向前行，即係立法會黨團、黨內加快年輕化新陳代謝，同埋創辦黨校。
過去一年以掟蕉、爆粗出位嘅社民連諗緊嘅長遠發展大計係要三條腿走路，佢哋創立黨校都構思得好具體，打算叫「普羅政治學校」，「普羅」解無產，不過社民連點計都唔係無產階級噃！日後黨校會分兩個層次，一係專為黨內培訓有意從政之士，一係以收費方式公開收生，教授政治課程。咦！聽落呢條先至係社民連嘅真正出路喎，有「錢」途！
此外，社民連喺大角咀物色咗一個單位用作會址，位近旺角地鐵站，鍾意嘅話，可以攞嚟做埋民間電台大本營，不過業主開價三百二十八萬，加上裝修費要幾十萬，佢哋仲未籌足經費，要搵人揼心口。