關節痛困擾好多人，嘉華集團創辦人兼主席呂志和嘅太太呂趙錦屏（圖）亦深受膝關節痛之苦，屢醫無效，好彩遇上理大良醫至醫得好。呂太尋日更自爆，家族成員早前喺美國遇上嚴重車禍，最後卻奇迹地一條頭髮都冇損傷，呂太唔肯透露家人遇險經過，話總知要多謝神喎。
向來係理大「大水喉」嘅呂志和，尋日聯同太太捐出四百萬元，支持理大成立「呂志和伉儷膝關節康復專科中心」。七十幾歲嘅呂志和健步如飛，但太太嘅膝頭近年出現退化，腳掌心不時隱隱作痛，試過針灸、推拿都唔掂，最後多得理大康復治療學系嘅教授打救，腳痛大有改善。尋日呂太着住對三吋高踭鞋剪綵，配一串如龍眼般大嘅珍珠頸鏈、耳環同戒指，手挽黑色Dior手袋，睇怕腳患已好得七七八八。
近期樓市飆升，身為地產發展商嘅呂志和尋日都話繼續睇好樓市，仲話樓市仍未出現泡沫，樓價向上係因為通脹形成，預期樓價仍會向高位走。對於係咪支持政府恢復賣地，呂志和就話冇所謂喎。