政圈動作多多，二○一二年選舉部署係其中一個焦點，上屆選舉後聲勢大大減弱嘅富貴黨密密諗計，親中陣營有消息話，原本出戰九龍西嘅田北辰，被勸轉戰新界西，有人仲講明屆時一定撐佢。呢個訊息等於梁美芬繼續有人力撐部署再戰九西，而富貴黨轉攻新西，等於建仔同工聯會要預埋佢哋一齊玩。
據講，今年八月富貴黨西藏行時，喺青藏鐵路捱咗二十個鐘頭車程，有親中陣營統籌人主動交心，叫田二少棄守九西，仲分析佢同梁美芬票源重疊，不如轉戰新西承接「莎姐」周梁淑怡嗰兩萬票好過，又話建仔嘅剩餘票可全數撥歸富貴黨。
消息話，建仔舊年喺新西攞九萬二千票，但八萬三千票已足以將張學明帶入局，另外嗰一萬票等於嘥咗，如果過戶畀富貴黨，親中陣營要喺嗰區攞四席，唔係冇可能。田二少接受我哋查詢時，冇承認亦冇否認被力勸轉戰新西嘅消息，只係一再強調至今未諗立法會選舉，依家全神貫注二○一一年區議會選舉，仲話去年一役令佢明白樁腳嘅重要性。