九月上任做科大校長嘅港產數學家陳繁昌，呢兩個月忙於同各方聯誼，未見佢有乜個性化表演，今日科大為迎接東亞運動會舉辦火炬傳遞活動，佢會擔任嘉賓兼最後一棒火炬手，佢除低西裝嘅首個個人表演吸引各界目光，大家都想睇吓呢個新校長嘅個人魅力同親和力同前任朱經武有冇得揮。
朱經武領導科大八年，贏得各界讚譽，珠玉在前，陳繁昌要更上一層樓真係唔容易。不過，陳繁昌嘅優勢都唔少，佢係土生土長嘅香港仔，早喺七年前，佢已用「香港製造」形容自己，又講得一口流利廣東話，同科大師生全無溝通障礙，更易被香港人受落。
今日佢就會以一身運動裝落場，同另外二十三個師生一齊喺校園接力傳送火炬，為下個月嘅東亞運動會搞吓氣氛。佢除咗做主禮嘉賓外，仲會擔任最後一棒火炬手，由於每個火炬手大概負責七十米嘅傳遞，所以運動量並唔算大。不過，呢次活動顯示陳繁昌都走緊同師生打成一片嘅路線，同朱經武異曲同工噃。