《梁祝》協奏曲今年誕生五十周年，原創者何占豪同演奏《梁祝》而聲名大噪嘅小提琴家西崎崇子，近期為慶祝《梁祝》金禧紀念馬不停蹄，除咗本月底喺香港大會堂舉行慈善音樂會，為四川地震災區籌建十所幼兒園外，尋日又專程去聖保羅男女中學附屬小學，同一眾學生分享人生音樂路。
西崎崇子尋日一襲白色喱士配橙底長裙，再配Chanel米白色手袋、名錶同碎鑽戒指，外表雍容華貴，仲即席演奏一曲《梁祝》協奏曲，呢首名曲喺佢手裏發揮得爐火純青。
西崎崇子話，學音樂就好似起高樓咁，根基要打得好，而拉小提琴嘅姿勢同演奏期間集中精神亦相當重要。何占豪就話，自己出生農村，冇諗過可以有今日嘅成就，鼓勵學生最重要係奮鬥同有理想，唔好怕辛苦。