本文重點
近排好多人質疑本港樓市已出現泡沫，有「樓神」稱號嘅長實集團執行董事趙國雄尋日出席一個場合時，就用香檳妙喻樓市︰「香檳要有泡先好飲！」說罷攞起眼前一杯已擺咗陣嘅香檳，但就無意飲住，侍應見狀，即刻開支新酒並斟滿畀佢。樓神接過之後，有意無意咁望住杯中急升嘅泡沫話，樓市要有泡沫，大家先有錢賺。
場中好多人會心微笑期間，樓神又拋出另一句：「冇泡沫嘅香檳冇人會飲喎！」幾句說話同動作，就將樓同香檳融合得絲絲入扣。
掃黑超擺甫士任影
尋日「溥儀1881」尖沙咀旗艦店開幕，樓神擔任嘉賓，向來識做嘅佢一剪完綵就拿拿臨入舖頭開張「好事成雙」嘅單，買咗兩副太陽眼鏡，佢分別買咗三千四百五十一蚊嘅Tag Heuer，同一千八百二十八蚊嘅Ermenegildo Zegna，兩副都係意大利牌子，佢跟住即刻戴上、擺埋甫士任人影相，仲問人靚唔靚添。