遭政界學者連環狙擊

張炳良公然同政府唱反調，可以話係一場政治賭博，一方面係民意嘅評估，一方面又要考慮政界對件事嘅睇法。上月二十二號，身兼房委會委員嘅佢同傳媒會面時，忽然拋出復建居屋嘅建議，仲迅即得到幾個房委會成員支持，冇辦法置業嘅冇殼一族更加拍爛手掌。

不過，張炳良嘅建議啱啱曝光，就畀政府連環狙擊，先係運輸及房屋局局長鄭汝樺澄清政府唔會以居屋干預樓市，冇耐又到鬍鬚曾話樓宇供應足夠，政府發言人更多管道吹風話唔會復建居屋。至於政界人士同學者，就相繼批評張炳良復建居屋嘅言論係違反行會紀律，亦深化咗管治危機，佢面對嘅壓力實在唔細。

古語有云，「禍兮福所依，福兮禍所伏」，呢句說話用喺張炳良身上實在好貼切，捱完一輪亂棍之後，佢尋日終於收到好消息，因為最新一期港大民調發現，佢係咁多個行政會議成員中支持度上升最多嘅一個，支持率更排名第二，僅輕微落後於港交所主席夏佳理，可見市民嘅眼睛係雪亮嘅。

呢件事再次證明特區政府施政出咗好大問題，連團隊中人都感到不滿，而被視破壞規條嘅行為又得到市民拍掌歡呼，煲呔曾政府真係要墊高個枕頭好好諗吓喇。