小白觀點：幫傷者解悶服務諗得過

見到白車三級制，大家千祈唔好心邪，以為上咗第三級白車有嘢睇喎。如果有人咁唔好彩遇上交通意外，孤伶伶攤喺路邊流咗兩公升血，意識迷糊下打電話Call白車，明明話係「畀架車撞到」，點知口齒唔清，救護人員聽成「畀家姐撞到」。家姐之嘛，又唔係弟婦，使乜急吖！既然咁耐冇見家姐，撞到咪傾多兩句囉，就咁歸類為第三級非危急個案，要等足二十分鐘白車至到！

話時話，等白車時間流流長，血又未流得晒，點算好？係咪應該增聘多啲奇能異士喺電話同傷者解吓悶呢？例如搵煮嘢So教煮公仔麵，又或者搵麥提爽講笑話，笑死咗咪唔使出動白車囉，等小市民含笑赴黃泉。

網友觀點......

美妮

都唔知邊個諗三級制呢個垃圾建議出嚟，一聽就知有問題唔Work啦！

BeeBee

如果我頭暈，有可能好大件事中風喎，咁計我邊一級呀，等得嚟都出事啦！

偉仔

有事都係搭的士去醫院仲快，又唔使等醫護人員評級，拗得嚟成個鐘都未去到醫院。

Tommy

接線生又有乜資格去評級呢，即係逼人喺電話度扮晒死狗，咁個個都變危急啦，邊有分別？

網址：www.sunsiupak.blogspot.com

阿豪觀點：高官人工要按民望分級

白車三級制公眾諮詢期已屆滿，唔知各位讀者老爺有冇咁神心，將意見提交畀當局呢？老實講，豪伯其實都唔知應該將意見send去邊。不過其實仲使乜諮詢吖，連救護員工會代表都話，三級制根本模糊咗件事嘅焦點，如果政府肯填補三百名人手同重整救護資源，就可以保證服務承諾。

咁又係呀，有人濫用還有人濫用，唔可以因為有小部分衰人，而搞到真正危急嘅市民可能被延誤治療㗎！況且市民一聽到「分級」就怕啦，好似警察剝光豬，或者淫審制度都有分級，有邊樣效果係令人滿意o架？計我話，要分級都唔好攞小市民嚟搞，你班高官根據民意支持度將人工分級仲好過啦！

網友觀點......

傻仔

連救護員工會都話唔可行，仲有咩說話好講呀？

唔明解

你哋成日鬧，點解唔提供一啲可行辦法杜絕濫用白車現象呢又？

尖子

依家問題關鍵係三級制容易造成誤判，令到真正有危急情況唔能夠及時獲救嘛！

勤仔

班官出糧夠要實施三級制啦：表現理想可以支全薪，其餘按工作表現比例遞減吖笨。

網址：www.lukchiho.blogspot.com