講到呢度，大家係咪覺得好震撼、好悲哀呢？等太一叮話畀大家聽，一個冰冷嘅事實係，呢套戲不單只係根據現實事件改編，而且類似嘅悲劇不斷發生。

年近四十嘅阿芬同內地丈夫有一個五歲嘅囡囡，丈夫爛賭成性，唔單止輸晒佢啲積蓄，而且不時對兩母女拳打腳踢。今年二月，阿芬帶住個女返嚟香港，身上只有七十八蚊現金，惟有向社署求助。點知社署職員一句撻埋嚟：「七十八蚊係少，但唔係無吖！緊急援助基金係批畀啲死人冧樓嘅個案，你都唔係……咩話？你有自殺傾向，嚟嚟嚟，快啲過嚟簽番個『君子協定』，記得自殺前打電話嚟求助喎！」

離譜哩？冷血哩？仲有更離譜嘅。四十七歲嘅阿寶同樣係家暴受害人，但社署多年來都不聞不問，直到有次嘈得太過犀利，驚動鄰居報警，社署先搵個社工跟跟。殊不知，派出嚟嘅原來只係一個實習社工，最興冷言冷語出口傷人：「想要申請公屋分戶咩？你都未正式離婚……想要申請乜乜援助咩？你都未畀人打到斷手斷腳，唔可以申請嘅。」

此外，呢個「社工」正經嘢就一問三唔知，淨係知道阿寶壓力爆煲常常失眠，後來帶阿寶去勞工處搵工時，忽然「出謀獻策」：「反正你都瞓唔到覺，返日班同夜班都無問題啦！」

嘩，有無搞錯呀？有無聽錯呀？其實諗落又覺得，一啲都唔出奇嘅，事關社署做事一向有套特立獨行嘅混帳邏輯，早前有一位因工傷無咗右腳嘅工人向社署申請傷殘津貼，個職員就話佢唔符合百分百傷殘嘅定義，唔批。既然斷一隻腳都唔算傷殘，使剩七十八蚊就唔係貧窮，至於未畀人打到斷手斷腳呢，直頭係幸運啦！

之不過，太一叮同大家都係正常人，用嘅都係正常邏輯，而根據呢套邏輯，如果斷咗一隻腳嘅申請者都唔算傷殘，只可以證明負責審批嘅社署職員智慧傷殘。家陣社署冷待家暴受害者，就進一步證明佢哋良心傷殘。

根據邏輯，繼續推論，社署前線敷衍塞責，出到實習社工單槍上陣濫竽充數，證明佢哋內部管理七國咁亂，高層人員監管不力，個個患晒責任傷殘。再順藤摸瓜搵落去，就要摸到社署署長聶德權嘅頭上，喺佢老兄管理下，成個社署智慧傷殘、良心傷殘、責任傷殘，弱勢社群得唔到應有嘅照顧，呢筆帳點計先？係咪要叮爆佢個鎯鎯呀！

咦，既然潮興怪力亂神，風水鴨可以一朝致富，轉運大師又可氹到模財色兼奉。等太一叮又嚟作法招魂，返來咯，返來咯……招乜嘢？社署無咗嘅良心囉。