尋日啟山首次搞賽事，好多世叔伯都出席撐場，爸爸霍公子一早就到，仲有新地集團副主席兼董事總經理郭炳江同足球總會主席梁孔德等，而香港明星足球隊就由曾志偉率領。

啟山以隊長身份率領港小總出戰，郭炳江亦一時技癢，落場踢咗幾分鐘。雖然有前香港足球先生山度士負責分波，但佢哋最終以四比六輸波，但全場焦點都落喺啟山身上。上半場全靠啟山夠勤力，救到一次空門，下半場仲「一cup一射」入咗球靚波，入球後全場為佢鼓掌，而啟山亦興奮到繞場一周，同一眾「粉絲」擊掌慶祝。