早前有環保團體發通緝令，通緝煲呔曾呢個氣候逃犯，尋日嗰個環保團體發起捐錢買機票畀煲呔曾去參加國際氣候變化會議，而白鴿黨嘅立法會議員甘乃威都有去撐場。
煲呔曾唔單止係氣候逃犯，仲因為推慳電膽現金券涉嫌利益輸送益親家，甘威竟然仲大讚「親家膽」。初時以為佢又踩多煲呔曾一腳啦，點知唔係，佢話「親家膽」好耐用，可以用幾年，佢遲啲仲會換埋部LED電視機，可以慳多啲電喎！
其實，甘威咁吹捧「親家膽」都唔奇怪。眾所周知，甘威因為涉嫌性騷擾女助理搞到滿城風雨，立法會內務委員會仲通過啟動彈劾佢嘅機制，總之沒完沒了，點知爆出煲呔曾「親家膽」風波，班議員前仆後繼咁追住要佢出嚟交代，直情冚晒甘威單嘢，佢可以得到暫時嘅自由，咪要多得「親家膽」囉！
由炒女助理至今都一段時間，上個月底另一個女助理亦離職，甘威話依家靠啲相熟朋友介紹，遲啲會公開招聘。咁請男定女呀？佢話男女都唔拘。梗係啦，若果為咗避嫌淨係請男助理，佢因住畀人告佢性別歧視呀！