玩具大王蔡志明太太李惠莉同大女蔡加敏尋日現身跑馬地馬場，佢哋一個用Prada、一個孭Chanel。加敏用嘅係最新款嘅Chanel限量版粉紅色絨毛布2.55手袋，佢本身開名牌手袋店，有專人去歐洲入貨，要買最潮貨色一啲都唔難。至於蔡太嘅窩釘Prada，雖則係四、五年前嘅限量版，但窩釘今季大熱，依家用都好潮，證明蔡太唔係盲目追名牌。
雖然加敏有個身價幾萬蚊嘅新袋，但睇嚟有啲心事，原來佢十七個月大嘅囡囡兩個禮拜前跣親要打石膏。依家佢為咗專心照顧囡囡，連工都返少咗。所謂養子方知父母恩，難怪佢忍唔住讚身旁嘅媽咪好偉大。
同場嘅林大輝唔知係好彩定黑仔，佢兩匹愛駒「確奇妙」同「極奇妙」都有落場跑，前者以冷門姿態第一次跑第一，淨係獨贏都分成四百蚊，但佢有事遲咗入場，睇唔到愛駒精彩演出，而有佢撐場嘅「極奇妙」就跑梗頸二。